💌 Log Kya Kahenge - Volume 07🧵 “Kaash phir se woh purani wali chhuttiyaan...”

“RUKAWAT KE LIYE KHED HAI!!
Zindagi ki gati ab ruk si gayi hai…
Toh pesh karte hain, ek chhota sa safar…
Jahan worries nahi, bas sapne the.
Aap sun rahe hain…
Babli Aunty ke Dil Se... FM 100.7 ‘Nostalgia Wali Frequency’ pe.
Aur aaj ka episode hai
‘Kaash phir se woh purani wali summer vacation...’

Toh lijiye, shuru hoti hai yaadon ki ek chhoti si baarish…”

“Kaash woh purani wali summer vacation wapas aa jaye…”

Jab duniya ka sabse bada tension hota tha ki
“aaj ka Doraemon miss na ho jaaye.”

Bahar baarish ho rahi hoti thi,
andar kitchen se mummy ke tadke ki khushboo aa rahi hoti thi,
aur hum chhupke Cartoon Network ke samundar mein doob jaate the.

Abhi bhi baarish hoti hai...
mummy bhi hai…
bas mummy ab thak jaati hai zyada,
aur hum… hum ab Doraemon ki jagah
laptop leke coding ke bugs se lad rahe hote hain.

Tab cricket hota tha gali mein,
badminton ki rassi hoti thi net,
aur chhupan-chhupai hoti thi shaam 7 baje tak.
Ab hide toh hum bhi karte hain,
but stress aur LinkedIn ke rejections se.

Tab tension hoti thi "pehli ball pe out toh nahi ho jaunga na?"
Ab tension hai "resume shortlist hoga bhi ya nahi?"

Sapna tha "jaldi bade ho jaayein"...
ab lagta hai -
thoda bachpan aur mil jaaye.

Woh school bus mein last seat,
haath mein paper ball ka cricket,
aur tuition bunk karne ke liye
"mummy, pet dard ho raha hai" ka drama...
sab kuch ek reel jaisa lagta hai ab.

Ab kisi aur ko nahi,
ghar waalon ko jhooth bolte hai toh lagta hai…
khud se jhooth bol rahe hain.

Woh guilt nahi hota jo chhupke ice cream khaane pe hota tha,
ab guilt hota hai sapno ko pause pe daalne ka.

Time badal gaya hai.
Par kabhi kabhi mann karta hai
ek baar fir se woh time machine ho
aur seedha le jaye…
Doraemon ke saamne baithe ek chhoti si muskaan ke paas.

🛍️ Share this with your dost jisko abhi bhi wo chhota sa school bag yaad aata hai.
📲 Follow @LogKyaKahenge for more taunts, tissues & truth bombs.